Frae: R. De Bruce Trotter, Galloway Gossip (1901), pp. 301-302
G—E had a sma pension frae a gude-sister o’ his, an sae he didna need tae do onything; but it wus his haunt tae gang a’ ower the country preachin; an he put a’ the collections awa in the bank for some fund in connection wi the kirk. He wus verra partickler tae pit in the verra pennies an ha’pennies wus put intill the plate, an he wudna ‘a’ cheinge’t a dizzen o’ them for a croon; he wantit the verra coppers he preach’t for, for a thank-offerin tae the Lord.
There wus certain places he gaed reg’larly till, an ithers he couldna be got tae gan tae. Some o’ them, ye see, had treatit him badly whun he wus puir, because he wus puir; an he said folk o’ that kin’ wusna fore-ordain’t tae conversion, an it wus nae use wastin the Gospel on them, yt the Lord ettle’t for ither folk. He said — “Cast not your pearls before swine, lest they turn again and rend you;” only he thocht it wus har’ly fair tae the swine tae even them tae siccan dirtery.
Definitions frae DSL (links are tae the relevant entries).
- Gude-sister ‘A sister-in-law.’ [GUID]
- Haunt ‘Custom, habbit, practice.’ [HAUNT]
- Ettle ‘To intend, purpose, plan (to do) a thing.’ [ETTLE]
- Siccan ‘Such, of such a kind, of a sort already mentioned.’ [SICCAN]
- Dirtery ‘A collective term, used contemptuously to denote a number of worthless, good-for-nothing people.’ [DIRTERIE]