THE WHITE HARE

Frae: R. De Bruce Trotter, Galloway Gossip (1901), pp. 247-248

SHE met a sair mishanter yince at the hans o’ Lord Kenmur.

It wus the yin afore Lord John, A think; but he wusna a lord aither, for the title wus forfeitit, but they ey ca’t him “lord” for a’ that.

He wus oot that wey huntin, an his dogs startit a white hare yt wus sookin a coo lyin in a fiel. He had seen this hare affen afore, an fire’t at it mony a time, but he never could hit it.

This time, hooever, he jaloose’t whut it wus, an cut yin o’ the siller buttons aff his waiscoat an put it in the gun, an fire’t, an the hare gied sic a yell, an ran limpin strecht for the clachan o’ Drooth, an the tykes efter’t, an the lord at their heels; an it lap in at the bole at the en o’ the wutches hoose, an left a trail o’ blude on the whitewesh o’ the wunnock.

Kenmur gaed tae the door, an it wus bar’t, an he shook at the door, an the bawties bowhh’t at the bole, but the wutch took nae notice; sae he dung the door in, an there sat the wutch, wi the bluidy button in the yae han, an a darnin-needle in the ither, thrang pykin the lead draps oot o’ her leg.

“Ay! Lucky!” says Kenmur, “A hae gruppit ye noo. Ye’ll roast in a tar barrel for this day’s doins.”

Hooever, she mindit him o’ some service she had dune him whun he wus in some desparate strait, an sae he wudna hae onything dune tae her; only she had tae gie ower sookin kye efter’t.

BURNS AN THE WHUSKEY-WIFE

THE WUTCH O’ DROOTH

Partial Glossar

Definitions frae DSL (links are tae the relevant entries).

  • Mishanter ‘A mishap, an unfortunate accident, a disaster; a state of misfortune or hardship.’ [MISHANTER]
  • Jaloose ‘To suspect, be suspicious of, to have doubts or suspicions about, guess, surmise.’ [JALOUSE]
  • Tyke ‘A dog, gen. with contemptuous force, a hulking uncouth ill-bred dog, a cur.’ [TIKE]
  • Lowp (past tense lap) ‘To leap.’ [LOWP]
  • Bole ‘A small opening in the wall of a building of any kind, usually provided with a wooden shutter instead of glass.’ [BOLE]
  • Wunnock ‘A window.’ [WINNOCK]
  • Bawtie ‘A name given to a dog, and in contempt to a human being.’ [BAWTIE]
  • Bowhh ‘To bark.’ [BOUCH]
  • Ding (past participle dung) ‘To knock, beat or strike: to drive; to push suddenly and forcibly; to displace or overturn by shoving.’ [DING]
  • Thrang ‘fully employed in any task or affair, actively and pressingly occupied in work, busy.’ [THRANG]
  • Grip (past tense gruppit) ‘To seize, catch, lay hold of.’ [GRIP]
  • Kye ‘Cows, cattle.’ [KYE]