Frae: R. De Bruce Trotter, Galloway Gossip (1901), pp. 245-246

WHUN the Gordons o’ Lochinvar wus expectin tae be made inta lords, they determine’t tae foond a great city tae be ca’t efter them, an sae they set feus aside the mill tae onybuddy yt wud take them, an ca’t the bit Gordonston; but few folk care’t tae big hooses on the edge o’ the muirs, whaur there wus nae kin’ o’ business an little chance o’ ony; an sae the gran’ propose’t Royal Burgh wus a failure, an they had tae pit their gran’ toon at The Roddins o’ Balingait, at the heid o’ Loch Ken, whaur there wus some plewable lan’, an the gran’ Castle o’ The Kenmur tae mak it respectable.

It did little gude there aither, for the Gordons wusna gien tae encouragin ony folk but theirsels; an efter it had nestle’t aneath the shedda o’ their wings for a hunner an saxty year, it wus sic an insignificant hole yt the only twa story hoose in’t wus the whuskey-shop; an the butler, an the flonkey, an the coachman, an the gardener, an the viscount at the Kenmur, wus made inta Provost an Bailies, for want o’ mair respectable burghers tae trust wi sic onerous positions.

A dinna ken if it’s ony better yet, though they hae made the toon steeple big aneuch tae be seen distinctly a haill quarter o’ a mile aff withoot a gless, an putten a new clock in’t.

Yin o’ my sons yt wus hame frae abroad, gaed through’t tae the Post Office yae day wi a red bonnet on, an he astonish’t the natives – or the immigrants raither; for there’s few natives in’t noo – they’r no alloo’t; they wur ower independent, an wudna turn Episcopalians maybe, an sae they gad tae gang; an the Eerish an the Half-breeds please’t better.

Whun he wus comin back again they wur cairryin the bedridden aul’ wifes tae the doors tae get a glower at the heathen foreigner, or the menagerie, – A’m no sure whuten a yin o’ them they took him for.

Sae ye see they’r benichtit there a wee yet.



Partial Glossar

Definitions frae DSL (links are tae the relevant entries).

  • Big ‘To build, construct (in gen.).’ [BIG(G)]
  • Flonkey ‘A man-servant, esp. in livery, a footman, a lackey, gen. with contemptuous force.’ [FLUNKIE]
  • Glower ‘An open-eyed stare, an intent look.’ [GLOWER]
  • Whuten ‘Which, of two or more.’ [WHATTEN]