Frae: R. De Bruce Trotter, Galloway Gossip (1901), pp. 242-243
IT’S an awfu bit thereawa onywey for folk seein things.
There’s a bit burn comes doon frae The Bogue an Ardoch wey, doon by The Holm Mill, an rins inta The Garpel; an there’s a brig ower’t on the aul’ road yt gangs ower the Mullock tae The Aul’ Clachan.
Weel, the doctor’s faither wus oot yae munelicht nicht seein some unweel buddy aboot The Hardlan, an he wus comin alang naur this brig, whun he met a great ban’ o’ Fairies comin alang in a raw, a’ haudin ither’s han’s an singan.
They wur aboot fowr fit high, an a’ dress’t in green, an there wus a gey wheen lassie yins amang them.
He didna ken hoo tae wun bye, for the road wus nairra, an he stood up tae the side. Than yin o’ them cry’t oot – “Open! an let the honest doctor through;” an wi that they pairtit i’e middle, an stood at the twa sides o’ the road till he wun bye.
They had queer hats on, an every yin as he gaed by pu’t it aff an made a gran’ boo, an a’ the lassie yins made a curtsey.
The doctor pu’t his hat aff too, an boo’t richt an left till he wun bye them, an than he turn’t an bad them “Gude-nicht,” an they answer’t him “Gude-nicht,” but he could see naething o’ them. It wud be aboot 1797, in the wunter time, an it couldna be an alcoholic vision, for he wus a man yt wudna taste drink o’ ony kin. It seems he affen saw Fairies, an they wur ey verra civil tae him, though the yins at The Holm Glen got an ill name thereawa.
Definitions frae DSL (links are tae the relevant entries).
- Thereawa ‘Of place: away to or in that district, over there, in that general direction.’ [THERE]
- Gey ‘Of quantity or amount: considerable, good, great, good-sized.’ [GEY]
- Wheen ‘A few, a small number, several.’ [WHEEN]
- Wun ‘= Eng. get: (1) to make or find one’s way, to proceed, pass on, to succeed in arriving at some destination, freq. with the notion of surmounting obstacles on the way.’ [WIN]