Frae: R. De Bruce Trotter, Galloway Gossip (1901), p. 403

LIKE the Campbells, the McClellans “breeze’t yont,” an gat their clauchts on the aul’ Castle o’ Raeberry, on Raeberry Heid, an had it sortit up.

They say it wus a native castel at first, an than the Fingauls took it an enlairge’t it, an in coorse o’ time the Maclellans gat it.

There’s nae castle there noo, naething but some steds o’ aul’ wa’s an a muckle stane, – an awsome muckle stane, joost in the middle o’ whaur the castle should be,

Some says it wus Wallace dung doon the castle wi’t, whun he couldna tak it frae the English nae ither wey. Some says it wus the aul’ giant Wicht o’ Portmark dung the castle ower wi’t tae get oot the Romans, or the Eerish, or the Fingauls, or somebuddy; an ithers says it wus the deevil cloddit it there oot o’ spite.

Hooever, it’s there yet, if the stanedyker haesna been at it wi his jumper an his poother-flask.

A dinna min’ if there’s ocht cut oot on’t or no.




“Wycht, laird of Portmark, a descendant of the famous Giant of Dundeuch” is mentioned in Lowran Castle, or the Wild Boar of Curridoo: with other tales, illustrative of the superstitions, manners, and customs of Galloway by Robert Trotter ‘Student of Medicine’ (1822, p. 99).

Partial Glossar

Definitions frae DSL (links are tae the relevant entries).

  • Clachts ‘Clutches.’ [CLAUGHT]
  • Sted ‘A site, foundation, base, on which something is erected, esp.: (1) the site of a building or wall.’ [STEID]
  • Clod ‘To throw, “to throw forcibly, most probably as one throws a clod.”’ [CLOD]
  • Poother ‘Powder.’ [POUTHER]
  • Ocht ‘Anything.’ [OCHT]