Frae: R. De Bruce Trotter, Galloway Gossip (1901), p. 411
PLENTY o’ fearfu stories is gaun aboot The Threave, but a’ yin hears is no gospel.
There’s a tradition, an a gey aul’ yin, for it’s mention’t in Symson’s Description o’ Gallawa aboot 1680, yt Mons Meg, or Munsh Meg as the common folk ca’s’t a’ ower Scotlan, wus made at The Munches by a country smith; an they say yt the words “Mons, Flanders,” yt’s on the gun, wus on the airn afore the gun wus made, for that wus whaur the airn cam frae, afore the Sweddish airn cam in. A’m no sayin whether it’s true or no.
Mr. Train said the smith’s name wus Brawny Kim. Weel, McKim, -Kim for short,- ‘s a name in Gallawa yet; but Brawny? A never heard or read o’ sic a name. If it’s the adjective “brawny=sinewy,” that’s no a Gallawa word ava, no even Scotch yin, sae A doot there maun be a mistak somegate.
A’m dootin a country smith couldna ‘a’ hanle’t it onywey. It taks maist o’ them a sair fecht tae hanle a horse-shoe athoot help.
Definitions frae DSL (links are tae the relevant entries).