JOHN THE BAPTIST

Frae: R. De Bruce Trotter, Galloway Gossip (1901), pp. 118-119

YE maybe didna ken yt John the Baptist wus a residenter in the Glenkens, but they say it wus a fact. A canna say A believe’t myself, for the Bible gies a different account o’ him.

It seems he wus a great man thereawa aboot the time o’ the Persecution, an took the Bluidy Claverse by the neck an the heels, an half-roastit him on the het girdle yt he hail-roastit the Coventanter on.

He wus mairry’t on yin o’ the Kenmure leddies, an whun Archbishop Sharp got him beheidit for roastin Claverse, they bury’t him in the Kenmure aisle amang the ither lords.

They didna bury him joost than, for the Kenmur lords wus a’ stuff’t, an they stuff’t him too, an he wus set up on his en’ in his coffin alang the wa’ wi the lave o’ them.

The coffins had a’ a pen o’ gless in the lids tae let ye see their faces, an the folk use’t tae ken St. John by the goold collar they put roon his neck tae hide whaur his heid had been haggit aff an sew’t on again.

They wur a’ bury’t whun the aul’ kirk wus dung doon, an the new yin biggit, an St. John wus bury’t alang wi them.

They hae some wunnerful accoonts o’ his adventurs aboot the Clachan, but they’r joost nonsense, sae A’ll no mention them.

See also: ST. JOHNSTOUN

CONSOLATION

ST. JOHN’S CHAIR

Partial Glossar

Definitions frae DSL (links are tae the relevant entries).

  • Thereawa ‘Of place: away to or in that district, over there, in that general direction.’ [THERE]
  • Lave ‘What is left over, the rest, the remainder, the others, of persons or things.’ [LAVE]
  • Hag ‘To chop (wood); to hack clumsily.’ [HAG]
  • Ding (past participle dung) ‘To knock, beat or strike: to drive; to push suddenly and forcibly; to displace or overturn by shoving.’ [DING]
  • Big ‘To build, construct (in gen.).’ [BIG(G)]
  • Clachan ‘A hamlet, village, gen. containing a church; “a small cluster of cottages”. [CLACHAN]