ANOTHER KIN’ O’ GHAIST

Frae: R. De Bruce Trotter, Galloway Gossip (1901), p. 307

TALKIN aboot ghosts, there wus a howe on the road atween The Fagra an Riddick Park, yt the doctor ey saw or he heard something in every time he pass’t it.

There wus yae nicht he had been at Dundrennan, an he wus comin hame that wey, an whun he wus in that howe he felt as if there wus a speerit or a ghaist close at han’. This continue’t till he cam tae the kirkyaird, an there wus a voice cry’t oot o’ the kirkyaird at him, -“Do a’ ye can, doctor, for my puir wife.”

He kent the voice finely; it wus the voice o’ a man they ca’t Tam McVittie, yt wus bury’t aboot a month afore.

He gaed the next day tae see her, but or he wun there she wus deid, an sae he had little chance o’ doin ocht for her, but attendin the burial.

HAME-MADE CLAES

THE GHAIST

Partial Glossar

Definitions frae DSL (links are tae the relevant entries).

  • Howe ‘A hollow or low-lying piece of ground.’ [HOWE]
  • Or ‘Before.’ [OR]
  • Wun ‘= Eng. get: (1) to make or find one’s way, to proceed, pass on, to succeed in arriving at some destination, freq. with the notion of surmounting obstacles on the way.’ [WIN]
  • Ocht ‘Anything.’ [OCHT]